Aminado makaron ro Department of Educations (DepEd) nga may kakueangan it mga guidance counselors kasunod it mga karahasan sa sueod it mga eskwelahang ginakaeakutan it mga estudyante.
Apang ginpahayag man ni DepEd spokesperson Michael Poa nga anda eon nga gina-aksyonan ro nasambit nga problema.
May una sigon nga problema sa kakueangan it guidance counselors para sa mga psychosocial needs it mga estudyante bangud eon man sa manabang sweldo ag kakueangan it career progression.
Ginpahayag dugang pa ni Poa nga ro mga violent incidents nga ginaeakutan it mga pamatan-ong estudyante hay posibleng may kaangtanan sa mental health issues.
Mas madaeom sigon ro problema sa mental health kumpara sa security sa mga eskwelahan.
Rason nga importante sigon ro presensiya it mga guidance counselors sa kada eskwelahan para masabat ro mental health needs it mga estudyante.
Sa isyu man it seguridad sa mga eskwelahan ginpahayag ni Poa nga ginmanduan eon ni Vice President ag Education Secretary Sara Duterte ro tanan nga regional ag schools division offices nga makipag-angot sa Philippine National Police (PNP) para matumod kung ano nga eskwelahan ro kinahangean nga magpatuman it spot inspections it mga armas maghalin sa mga learners ag staff members.
