Ginmanduan it Department of Education (DepEd) ro andang mga Regional Offices (ROs) nga siguraduhon nga insigidas nga maigatao ro cash allowance para sa mga manugturo nga nagabalor it P5,000 nga pagamiton sa nagahilapit nga pagbukas it klase.
Sa memorandum nga ginpirmahan ni Undersecretary of Finance (OUF) Annalyn Sevilla ko Agosto 4, nakabaehag ro proseso ag pagbayad it Fiscal Year (FY) 2022 cash allowance sa mga manugturo.
Ginpahayag it DepEd nga ro P5,000 cash allowance hay igatao sa mga classroom teachers para sa pagbakae it mga gaeamiton ag materyales sa pagturo, para sa subscription sa internet, ag iba pang gastos sa komunikasyon.
Gindugang pa it DepEd nga ro nasambit nga allowance hay gintaeana man para sa “annual medical expense” para sa SY 2022-2023.
Sa DepEd Order No. 10 s. it 2020, nasambitan nga ro cash allowance hay igatao sa mga angay ag bagay nga manugturo sa pangpublikong skwelahan nga bukon it mas timprano kumpara sa opisyal nga pag-umpisa it dag-on it klase.
Samtang, may kaangtanan kara ro ginpahayag it DepEd nga dapat pagasiguraduhon it mga RO nga ro allotment para sa ginatuyo hay igaproseso ag igapaguwa it Schools Division Offices (SDOs) sa indi magbuhay nga tyempo.
