KALIBO, Aklan–Nagpatigayon it consultative meeting ro Department of Education ukon DepEd sa isla it Boracay ko nagtaliwan nga domingo agud nga matumod ro presenteng problema nga ginapangatubang it basic education sa Pilipinas.
Raya ro ginpahayag ni Bryan Ray Solano, tagapaghambae it Department of Education ukon DepEd-Malay.
Nasayuran nga sambilog si Solano sa mga naimbitahan sa consultative meeting kaibahan ro mga assistant secretary ag undersecretary it ahensiya.
Suno kana nga doble ro naging purpose ni Vice President ag DepEd Secretary Sara Duterte-Carpio sa pag-agto sa Aklan ko nagtaliwan nga domingo nga mag-eowas sa anang pagtambong sa ati-atihan festival it Ibajay ag pagtindog bilang guest speaker sa aklan ten most outstanding mentor ukon ATOM award hay ginbitbit nana ro anang executive committee agud nga magpangayo it feedback ukon assessment sa grassroots level.
Posible sigon nga ro matipon nga mga impormasyon ukon inputs hay pagagamiton it bise presidente sa anang nakataeanang basic education report 2023 sa Lunes nga adlaw , kun sa siin igaplastar ro presenteng hangkat nga ginapangatubang it sektor it edukasyon ag ro pagtumod sa top priorities it ahensiya.
Ro consultative meeting sa Boracay hay ro ikatlong kahigayunan nga ginpatigayon sa region 6.
Imbitado sa event ro tanan nga mga superintendents, assistant superintendents, ag school heads it nagkaeain-eain nga eskwelahan sa bilog nga western visayas.
Sa makaron hay prayoridad it deped nga matur-an it pagbasa ag pagsuma ro mga learners.
Nakataeanang igalunsar it deped ro andang education agenda partikular ro pagtumod sa andang plano ag inisyatibo agud nga maresolba ro mga hangkat.
Madumduman nga ginaduso makaron ni VP sara ro reform in education.
Sa pihak nga parte, ginkumpirma ni solano nga sa pebrero 6 hay magapatigayon it sem-break ro mga estudyante.
