KALIBO, Aklan—Nakalista it mataas nga numero it mga estudyante nga nakapa-enroll sa mga pampubliko ag pribadong eskwelahan sa bilog nga probinsiya it Aklan makaron nga school year kumpara ko nagtaliwan.
Raya ro ginpahayag ni Dr. Miguel Mac Aposin, Schools Division Superintendent it Department of Education ukon DepEd-Aklan.
Sa kamatuoran suno kana ro aklan ro may pinakamataas nga enrollment rate sa bilog nga rehiyon sais.
Sa pihak kara, nagpanawagan si Dr. Aposin sa mga ginikanan nga i-finalize eon ro enrollment it andang mga unga agud nga maeakip sa opisyal nga listahan.
Preparado eon man sigon ro andang mga learning materials para sa blended learning nga kasado eon sa pag-umpisa it klase sa lunes nga adlaw Setyembre 13.
Sa pihak nga parte, maskin nga owa it eskwelahan sa Aklan ag maskin sa bilog nga western visayas nga na-qualify para sa pilot implementation it face-to-face classes, ginpahayag ni Dr. Aposin nga ginatun-an eon nanda ro guidelines para kara.
Mag-eowas kara, ginapapahaum eon man nanda ro mga eskwelahan agud nga maging handa sa face-to-face classes.
Madumduman nga nagpahayag eon it kahauman ro DepEd sa pagpatigayon it pilot face-to-face classes sa pihak it COVID-19 pandemic situation sa nasyon engkasong pasugtan eon ni Pangueong Rodrigo Duterte.
Sa masobra sa 600 nga mga ginkonsidera nga eskkwelahan, 100 eamang ro nakapasar sa evaluation nga makit-an sa mga lugar nga klasipikado bilang low-risk sa COVID-19.
