Pinuri ng Department of Education (DepEd) ang administrasyong Marcos sa inilaang PHP1.224 trilyong panukalang badyet para sa sektor ng edukasyon sa 2026, na ayon sa ahensya ay kauna-unahang tumalima sa 4% ng GDP alinsunod sa pamantayan ng UNESCO.
Sa ilalim ng National Expenditure Program (NEP), PHP928.52 bilyon ang mapupunta sa DepEd — mas mataas ng 18.9% kumpara sa 2025. Prayoridad ng pondo ang mga pangunahing programa gaya ng operasyon ng mga paaralan, senior high school vouchers, school-based feeding, at imprastruktura ng mga silid-aralan.
May alokasyon ding inilaan para sa dagdag na plantilla positions, computerization, at mga ahensyang kaakibat ng DepEd. Kasama rin sa pondo ang suportang ibinigay sa SUCs, CHED, at TESDA.
Itinuturing ng DepEd ang panukalang badyet bilang isang mahalagang hakbang tungo sa pagpapabuti ng kalidad ng edukasyon at paghubog sa kinabukasan ng kabataang Pilipino.
