KALIBO, Aklan—Plano makaron it Department of Education (DepEd) nga buksan ro School Year 2021-2022, sa Agosto 23.
Apang, suno kay Dr. Miguel Mac Aposin, Shools Division Superintendent it DepEd-Aklan nga indi pa raya makabig nga opisyal nga petsa it pagbukas it klase.
Engkaso nga madayun raya hay posibleng mapatag-uran ro bakasyon it mga estuyante bangud nauna eon nga ginpaathag it ahensya nga ro closing it School Year 2020-2021 hay gintaeana sa Hulyo 10.
Buot hambaeon kara, magiging an-om nga dominggo eon lang ro bakasyon it mga estudyante halin sa dating daywang buean.
Ginapahauman sigon it ahensya ro ideal scenario para sa masunod nga school year.
Ginpasiguro man kara nga iga-improbar pa it DepEd ro mga pamaagi kun paalin maka-iskuyla ro mga estudyante sa tunga it padayun nga paeag it COVID-19 pandemic.
Samtang, nag-apela man raya sa mga ginikanan nga ipa-enroll eon ro andang mga unga para sa early registration.
Sa pihak nga parte, sigidas man ro ginahimo nga preparasyon it DepEd-Aklan sa posibleng implementasyon it limited face-to-face classes sa masunod nga dag-on.
Nagaeaum man si Dr. Aposin nga mapasugtan eon ro pilot implementation it limited face to face classes.
May sambilog eon sigon sanda nga target nga eskwelahan nga paga-patigayunan kara.
Sa makaron hay mas importante sa gihapon ro kaeuwasan it mga estudyante, ginikanan ag manugturo.
