KALIBO, Aklan—Taw-an it kahigayunan ro Department of Education sa gina-proponer nga magpatigayon it dry run ukon pilot implementation it face-to-face classes sa Enero 2021.
Raya ro ginpahayag ni committee on education chairman it sangguniang panlalawigan Soviet Russia Dela Cruz.
Suno kana nga kapareho it andang ginduso ko una nga modular system sa tunga it pandemya tuga it covid-19 nga maskin maabu ro nag-oponer hay ginpamatud-an it DepEd ro andang ikasarang.
Apang sa ginaproponer suno kana nga pagbalik it face-to-face classes, dapat nga taw-an kara it konsiderasyon ro availability it mga classroom eabi eon sa mga pampublikong eskwelahan kun sa siin hay maabu ro mga enrolees ag medyu mabudlay nga masunod ro health protocols partikular ro pag-obserba it physical distancing.
Gindugang pa ni Dela Cruz ro pinansiyal nga kapasidad it pamilya eabi pa ag maabu ro naduea-an it trabaho ag kabudlay sa transportasyon nga mag-eowas nga mahae ro pamasahe hay limitado ro ginasakay nga pasahero.
Angot kara, nag apela imaw sa deped nga estudyuhan ro andang proposisyon eabi pa ag owa pa it available nga bakuna sa makaron sa Pilipinas kamana man sa mga ginikanan nga maging bukas ro isip sa nasambit nga plano.
Madumduman nga gin-anunsyo it Malacañang ko Lunes ro pag-apruba ni Pangueong Rodrigo Duterte sa face-to-face classes sa Enero 2021.
Apang dapat nga una sa low-risk area ukon modified general community quarantine ro eskwelahan.
Boluntaryo man nga magasueod ro mga estudyante, kun sa siin dapat nga may written constent it ginikanan ag magasunod sa health standards sa eskwelahan, baeay ag transportasyon.
