KALIBO, A klan—Gin-engganyo it Department of Education ukon DepEd Region 6 ro mga ginikanan ag guardians it mga magapa-enroll nga Kindergarten, Grade 1, Grade 7, ag Grade 11 sa mga pampublikong eskwelahan sa Western Visayas nga magpasakop sa early registration para sa school year 2025-2026.
Suno kay Mr. Hernani Escullar, tagapaghambae it DepEd Region 6 nga ro nationwide early registration hay nag-umpisa kato pang Enero 25 ag magabuhay hasta sa Pebrero 15.
Kinahangean suno kana nga mag-agto ro mga ginikanan ukon guardian agud nga masabtan ro Basic Education Enrollment Form.
Mas mayad man sigon nga magdaea eagi it birth certificate it estudyante.
Kun owa it birth certificate, pwedeng magdaea it barangay certificate nga nakabutang ro kumpletong pangaean it estudyante, birthday, address, pangaean it mga ginikanan ag iba pang importanteng impormasyon.
Ginpahayag pa ni Escullar nga nagapangunang katuyuan it early registration hay mabuligan ro DepEd sa pagplano ag pagpahaum para sa masunod nga dag-on, partikular sa tamang alokasyon para sa kada estudyante.
Ginklaru man nana nga ro mga estudyante sa ibang lebel kapareho it Grade 2 hasta Grade 6 ag Grade 12 hay makabig eon nga pre-registered ag indi eon kinahangean nga mag-agi sa early registration.
Ko nagtaliwan nga dag-on , ro numero it mga nagpasakop sa early registration sa Western Visayas hay nag-abot sa 335,155 para sa School Year 2024-2025.
Agud nga makaengganyo it mga magapasakop sa early registration, gin abisuhan suno kana it DepEd ro mga school heads nga magbutang it mga banner, streamer, ukon iba pang campaign materials sa eskwelahan.
Kamana man nga mag post it anunsyo sa andang mga opisyal nga Facebook page agud nga mapaeapta ro angot sa nasambit nga aktibidad.
