All systems go eon ro dag-unan nga regional sporting events sa Western Visayas nga pagapasakupan it waeong schools division.
Suno kay Mr. Hernani Escullar Jr, tagapaghambae it Department of Education ukon DepEd region VI, nakaangkon it series of coordination meeting ro mga tagsa ka opisyal it schools division kon sa siin gindeklara nga haom eon ro tanan para sa igapatigayon nga Western Visayas Regional Athletic Association ukon WVRAA Meet 2026 nga pagahiwaton sa Passi City nga maga-umpisa ro regular sporting events halin it Marso 18 hasta it 22, 2026.
Kapin sa 6,965 contingents nga maghalin sa waeong schools division nga ginakaeakipan it Aklan, Antique, Capiz, Iloilo Province, Iloilo City, Passi City ag Guimaras ro magapasakop sa nasambit nga sporting events.
Sa nasambit nga numero, 3,933 ro mga atleta; 1,087 ro official and members it technical working group ag 1, 467 ro coaches, trainors, chaperrons ag iba pa.
Mag-eowas kara, may 723 nga officials ag 102 non-officials nga magahalin sa region rason nga masobra sa 8,000 nga indibidwal ro magaadto sa Passi City para sa dag-unan nga sporting events.
Dugang pa ni Escullar nga ro tema makaron nga dag-on hay “Stronger Champion, Greater Heights”.
Madumduman nga ko nagtaliwan nga WVRAA Meet 2025 nga ginhiwat sa probinsya it Antique hay nakuhit it Aklan ro pangatlong pwesto nga naka-angkon it 33 gold medals, 47 silver medals, ag 104 bronze medals.
Nagpanguna ro probinsya it Iloilo nga nakabuoe it 180 gold medals, 149 silver medals, ag 112 bronze medals ag ginsundan raya it probinsya it Negros Occidental nga nag-angkon it 168 gold medals, 133 silver medals, ag 117 bronze medals.
apang makaron nga dag-on, inde eon makit-an ro mga atleta maghalin sa Negros Island matapos nga nagseparar sanda sa Western Visayas.
