KALIBO, Aklan—Nakalista ro Department of Education ukon DepEd Region 6 it 312,103 nga learners sa Western Visayas sa ginpatigayon nga early registration para sa school year 2023-2024 kun sa siin pormal raya nga nagtapos kahapon nga adlaw, Hunyo 9, 2023.
Suno kay DepEd Western Visayas information officer Hernani Escullar Jr., nga ro nasambit nga numero hay posibleng magataas pa sa masunod nga mga inadlaw sa oras nga mapasueod ukon ma-encode it ibang eskwelahan ro andang record eabi eon ro mga halin sa maeayo nga lugar nga mabudlay ro andang internet connection.
Raya hay ginaeakipan it mga early registrants para sa Kindergarten; Grade 1; Grade 7; ag Grade 11.
Sa probinsiya it Aklan, kapin sa 20,660 ro nagpasakop sa early registration.
Suno kay Escullar nga raya ro magaserbi nanda nga basehan sa pag-plano ag pagpahaum eabi eon it mga classrooms, student-teacher ratio, numero it modules ag learning materials ag iba pang resources para sa masunod nga school year.
Ro numero hay manaba kumpara sa 360,571 ukon 86.56% sa mga early registrants ko nagtaliwan nga school year.
Apang suno kana nga nagapadayun pa ro encoding ag posibleng maeampasan ro nasambit nga numero.
Ro school year 2023-2024 hay posibleng pagahiwaton sa Agosto 28, 2023, apang ginlaygayan ro mga ginikanan nga magbantay sa dugang nga detalye sa igapaguwa nga DepEd order para sa masunod nga school year nga imaw ro magiging opisyal nga baeasihan.
