Haeos preparado eon ro tanan para sa paaeabuton nga Western Visayas Regional Athletic Association ukon WVRAA meet 2023 sa probinsya it Aklan.
Suno kay Hernani Escullar Jr., spokesperson it Department of Education ukon DepEd region VI nga nakapatigayon eon sanda it inspection ag nagapadayon ro andang mga coordination meeting sa DepEd Aklan agud nga masapinal ro tanan nga mga kinahang-ean para uwa eon it mga problema nga magatuhaw sa pag-arangkada it sporting events nga paga-umpisa it opening ceremony sa Abril 26, alas-3:00 sa hapon.
Nakit-an sigon nga convenient ag comfortable para sa mga delegado ro gin-alokal nga billeting quarters para sa mga kaeapit nga probinsya ag anda eon man sigon raya nga nasikyar.
Sa makaron hay sigidas pa ro koordinasyon sa mga natungdan eabi eon sa pamunuan it Aklan provincial hospital sa mga emergency cases nga kinahang-ean nga mataw-an eagi it igtaeopangod eabi eon sa tuman nga kainit it panyempo makaron.
Sa kabilugan, ro Negross Occidental hay may delegasyon nga 847; Iloilo nga may 787; Guimaras nga may kapin sa 381; Capiz nga may 681 ag ro Aklan hay kapin sa 742 ro magapasakop sa mga nagkaeain nga sporting events kaibahan ro mga coaches, technical officials ag iba pang committees.
