KALIBO, Aklan–Nakalista ro Department of Education (DepEd)-VI it kapin sa 57 nga kaso it bullying sa mga eskwelahan para sa School Year 2021-2022 sa bilog nga Western Visayas.
Suno kay Hernani Escullar Jr., tagapaghambae it DepEd-VI nga na-classify raya sa limang klase it bullying partiklar ro physical, social, gender based bullying, cyber based bullying ag retaliation.
Base sa datus it taeatapan, 23 nga eaeaki ag siyam nga babayeng learners ro imbolbado sa physical bullying samtang limang eaeaki ag ap-at man nga babaye sa social bullying kamana man limang eaeaki ag daywang babaye sa gender based bullying.
Tig ap-at nga eaeaki ag babaye man ro naeakip sa cyber based bullying samtang sambilog ro nailista sa retaliation.
Makabig sigon nga maka-alarma ro hitabo bangud nagatuga raya it trauma sa mga biktima.
Gin-insister ni Escullar nga kinahang-ean nga mataw-an it nagakaigo nga igtueopangod ro mga kaso it bullying agud nga daeayon nga maresolba ro problema.
Gin-engganyo man kara ro mga learners ag ginikanan nga insigidang mag-report sa school heads engkaso nga maka-eksperyensya it pagpang-bully.
Dapat sigon nga masiguro nga ro kada eskwelahan hay magserbing euwas nga lugar para sa mga estudyante.
