KALIBO, Aklan—Nakalista eon ro Department of Education ukon DepEd Western Visayas it 82,763 nga mga learners sa rehiyon sa haeos sang domingo nga pag-arangkada it andang early registration para sa school year 2023-2024.
Suno kay DepEd Western Visayas information officer Hernani Escullar Jr., nga ro nasambit nga numero it mga learners hay nakabaehag sa andang learner information center as of 8:00 am makaron nga adlaw, Mayo 22.
Ro early registrants hay ginaeakipan it Kindergarten, Grade 1, Grade 7; ag Grade 11.
Ginpaathag ni Escullar nga raya hay magaserbi nga baeasihan para sa andang pagplano ag pagpahaum partikular sa mga kinahangeanon nga classrooms, numero it mga estudyante, mga modules ag iba pang learning materials kamana man ro iba pang resources para sa masunod nga school year.
Nasayuran nga ko nagtaliwan nga dag-on hay nakalista it early registrants nga masobra sa 360,000.
Kadungan kara, ginpahayag ni Escullar ro early registration hay kaparte man it andang kampanya sa DepEd agud nga maengganyo ro mga ginikanan nga ipa-enroll ro andang mga unga nga nagpundo sa pagtuon ko tiempo it pandemya.
Ginaeauman nga maeampasan sigon nanda ro nagpalista sa early registration ko nagtaliwan nga 2022.
Ro early registration hay nag-umpisa ko mayo 10 ag magatapos sa Hunyo 9, 2023.
Ro mga learners sigon halin sa iba pang grade levels hay bukon it kaeakip sa early registration bangud nga automatic eon sanda nga nakarehistro sa masunod nga grade level.
