KALIBO, Aklan–Nagapadayun ro mga adbokasiya ag awareness program it Provincial Health Office (PHO)-Aklan kaeakip ro may kaangtanan sa mental health.
Suno kay Psyche Jane Villorente-Ruiz, Medtech I it PHO-Aklan nga naga-adto sanda sa mga lokal nga gobyerno kamana man nga nagatao it technical assistance sa mga Rural Health Unit (RHU).
Raya hay kasunod it mga serye it pagpakamatay sa probinsya it Aklan.
Suno kana, ro depression ro nagapangunang risk factor it pag-suicide it sangka tawo.
Aminado man imaw nga malisod masayuran kung nagapangatubang sa grabeng problema ukon kalisod ro tawong may depression bangud ro iba kanda hay owa man nagapakita it pagkasubo sa atubang it mga barkada ag iba pang kaabyanan.
Kaeabanan sigon sa mga rason it nagapatigayun it suicide hay may problema sa andang relasyon, pamilya, baeatian ukon financial aspect.
Ginlaygayan man kara ro tanan nga maging “observant” sa mga tawong nakakaibahan agud nga insigidang mabuligan antes pa man maulihi ro tanan.
Indi sigon dapat pagbalewalaon ro maskin maisot nga senyales it pagka-depress.
Engkaso nga makabatyag it depression hay dapat magpaeapit eagi sa pamilya, trusted nga amigo ag amiga ukon magpangayo it bulig sa mga eksperto nga may kasayuran sa pagtratar it makarondaya nga kondisyon.
