KALIBO, Aklan—Dere-deretso ro ginapatigayon nga pagbakuna sa mga prayoridad nga sektor sa banwa it Kalibo.
Suno kay Kalibo mayor Emerson Lachica nga maabu eon man ro naturukan nga mga residente nga puro nagbaton it unang dose it bakuna it Sinovac ag Astrazeneca.
Gindugang pa kara nga ro andang vaccination rollout hay nakadepende sa pag abot it mga suplay it bakuna kontra sa COVID-19 halin sa department of health nga ginapaagi sa Provincial Health Office.
Ginpahayag pa ni mayor Lachica nga ginasiguro nanda ro maayos nga sistema it pagtau it COVID-19 Vaccination Card sa kada nabakunahan it unang dose.
Nakabutang sigon kara ro petsa it unang pagturok it 1st dose ag kon hin-uno uman nga magabalik para sa ikaywang dose.
Tuyo kara nga makabalik sanda sa gintaeana nga petsa para sa pagturok it second dose.
Samtang, owa pa sigon sanda it update kon hin-uno maga abot ro supply it astrazeneca nga andang ginbakae mismo.
Kaibahan pa sa andang plano it Vaccine Czar nga si Rey Villaruel nga magabakae it refrigerator nga nagabagay para sa bakuna nga himo it pfizer agud nga engkaso nga makaangkon it kahigayunan hay maga purchase man sanda kara.
