KALIBO, Aklan—Ginpahayag ni Atty. Plaridel Morania, sangka batikang abogado sa Aklan nga kinahangean nga hueaton ro desisyon it Commission on Elections ukon Comelec 1st division nga magguwa bangud nga samtang owa pa, ro tanan nga mga pahayag hay makabig nga puro espekulasyon.
Raya hay may kaangtanan sa pagsapubliko ni Comelec Commissioner Rowena Guanzon it anang boto ko huwebes it gabi-i nga nagapabor nga i-disqualify si presidential aspirant Ferdinand “Bongbong” Marcos Jr.
Suno kay Atty. Morania nga ro kaso hay nakapending pa makaron sa 1st Division, kun sa siin si guanzon ro presiding commissioner rason nga makabig nga subjudice kon paga-istoryahan ro kaso.
Engkaso suno kana nga majority ukon ro daywang miyembro it division hay magapabor nga padayunon ro pagpadaeagan ni Marcos, magapabilin nga dissenting opinion ro pahayag ni Guanzon.
Gindugang pa ni Atty. Morania nga medyu napilitan si Guanzon nga ipaguwa sa publiko ro anang boto bangud pamatyagan kara nga nag-lapse eon ro division sa gintaeana nga deadline, kun sa siin ro andang ponente ukon writer it desisyon, si Commissioner Aimee Ferolino hay naging “incommunicado” ukon owa pa nagatau it pahayag.
Mag-eowas kara, nagaduda imaw nga may pulitiko nga nagapatunga agud nga maatraso ro resolution.
Madumduman nga si Guanzon hay nakataeanang maga-retiro sa masunod nga miyerkules, Pebrero 2, ag gusto nana nga mapaguwa it division ro resolution antes nana nga aywan ro Comelec.
Ginpaathag pa ni Atty. Morania nga ro tanan nga kaso hay ginaeauman nga iga-apela sa comelec enbanc antes nga mapasaka sa korte suprema.
