KALIBO, Aklan – – – Plano makaron it Sangguniang Panlalawigan it Aklan nga magdihon it resolution of appeal sa inter-agency task force ag kay Pangueong Rodrigo Duterte may kaangtanan sa suhestiyon nga ipasara ro isla it Boracay.
Raya hay kasunod it pagbansag it pangueo nga “cesspool” ro baybayon it isla.
Gina duso man ni Department of Tourism Secretary Wanda Teo, Department of Environment and Natural Resources Secretary Roy Cimatu ag Department of Interior and Local Government Secretary Eduardo Año nga isarado ro Boracay sa sueod it 60 diyas agud taw-an it daean ro rehabilitasyon kara.
Sa gin patigayun nga regular session it SP, nagkasugot ro mga board members nga dapat nga iapela ro desisyon bangud sa epekto kara sa linibong trabahador kamana man sa imahe it isla.
Ro mga establisimentong nakitaan eamang sigon it pag eabag ro dapat nga ipasara ag bukon it ro bug-os nga isla.
Gin pahayag man ni Vice Governor Reynaldo Quimpo nga owa it legal nga basehan agud himuon ro nasambitan nga tikang mag eowas pa nga kueang ro 60 diyas agud makay-ad ro Boracay.
Madumduman nga nauna eonman nga nagdihon it resolusyon ro SP Aklan nga naga suporta sa panawagan ni Duterte nga limpiyuhan ro isla.
