Sangka diamond ring nga nai-flush sa toilet masobra sa sang dekada eon ro nagtaliwan ro himalang naibalik sa nagapanag-iya kara!
Ko Marso 2023, may nakit-an nga singsing si John Tierney sa sangka waste water plant sa Minnesota.
Sa siyam nga dag-on nana nga pagtrabaho bilang maintenance manager, rato pa eang imaw nakapueot it maeahaeon nga bagay halin sa machinery it andang planta.
Agud nga mausoy ro tag-ana it singsing, nagpangayo it bulig si Tierney sa mga local news agency sa Rogers, Minnesota para ibalita sa mga local news program idtu nga gina-usoy nanda ro nagapanag-iya it nakit-an nanda nga diamond ring.
Owa ginpakita ro itsura it diamond ring sa TV agud nga malikawan ro mga magpakuno-kuno nga anda ro singsing.
Nakita ni Mary Strand sa TV ro news feature angot sa nakit-an nga diamond ring ag nagduda imaw nga raya ro naduea nana nga singsing.
Ro diamond ring hay 33rd wedding anniversary gift kana it asawa ko 2008.
Haeuga raya sa anang tudlo rason nga pilang buean matapos nga ginregalo raya kana , nahueog sa anang alima ag tumugpa sa toilet.
Nakipag angot si Strand kay Tierney.
Gin-describe ni Strand kun anong itsura it naduea nana nga singsing ag nagkasinanto raya sa diamond ring nga nakit-an ni Tierney.
Masobra sa 100 nga katawo man ro nag-claim nga sanda ro tag-ana it naduea nga singsing apang si Strand eamang ro nakatau it eksaktong description kun ano ro itsura kara.
Kat ginbalik eon kay Strand ro singsing, nagpasaeamat raya ag ro anang asawa kay Tierney.
Nagpasaeamat man raya sa local news program nga nagpanawagan agud nga sanda hay usuyon.
