KALIBO, Aklan—Gin-endorso eon it Department of the Interior and Local Government ukon DILG Aklan sa regional office ro pormal nga reklamo nga andang nabaton angot sa scholarship grant it gobyerno ukon ro Bawat Barangay Makikinabang (BBM) Program nga kapin sa P100,000 pesos nga pagatungaon it limang ka mga estudyante.
Angot kara, ginkumpirma ni Officer-in-Charge Provincial Director LGOO VII Raymundo D. Palanog it DILG Aklan nga may mga reklamo sanda nga nabaton ag agud nga mataw-an it aksyon hay gin-endorso eon nanda raya sa regional office.
Una kara, maabong estudyante ro nagpaabot it tagsa-tagsa nanda nga reklamo matapos nga uwa naqualified sa scholarship grant maskin nga sa tan-aw nanda hay sambilog sanda sa pwedeng maging benepisyaryo it programa.
Dugang pa ni Palanog, mag-eowas sa formal complaint hay may nagpaabot man it reklamo verbally rason nga gin-engganyo nanda ro mga raya nga ibutang sa eksaktong proseso agud nga mataw-an it kahusayan ro andang reklamo.
Samtang sa pihak nga parte, uman nga ginhathat ni Palanog ro mga criteria sa pagpili it mga benepisyaryo it nasambit nga programa.
Kinahang-ean man suno kana nga maging transparent ro barangay council sa tanan nga proseso ag sa pagpili it mataw-an it tig-P20,000 pesos nga mabahoe nga bulig sa andang pag-eskwela eabi eon ro mga graduating students makaron nga dag-on.
