Ginpahayag ni Department of the Interior and Local Government (DILG) Secretary Jonvic Remulla nga pagahinyuon it ahensya sa Sandiganbayan nga isaylo si dating House Speaker Martin Romualdez halin sa pribadong Cardinal Santos Medical Center sa Philippine National Police General Hospital sa Camp Crame.
Suno kay Remulla, igadihon ro mosyon agud nga maisaylo sa kustodiya it pulis si Romualdez samtang ginabueong, maskin nga nakadepende gihapon sa Sandiganbayan ro desisyon. Ginpasugtan eon man sigon it anang mga doktor nga padayunon ro pagbisita ag pag-alaga kana sa Camp Crame.
Naka-confine sa ospital si Romualdez kat ipatuman ro warrant of arrest kontra kana angot sa kasong plunder.
Ginkasuhan imaw kaibahan si dating Ako Bicol Rep. Elizaldy Co ag daywang iba pa, bangud sa gina-alegar nga pagbaton it masobra sa P7.44 bilyong kickback halin sa mga proyekto it gobyerno. Ginpamilit man it kampo ni Romualdez nga iga-respeto kara ro proseso it korte ag paga-atubangon ro mga alegasyon.
Ginmanduan man it Sandiganbayan si Romualdez nga mag-atubang sa korte sa Setyembre 10 angot sa anang mosyon nga magpabilin sa ospital. Suno sa korte, raya ro may gahum nga magdesisyon kun magapabilin imaw sa ospital ukon igasaylo sa pasilidad it presuhan.
