Kalibo Aklan ——–Bangud nga bawae ro nakasanayan nga pagpaligos sa mga baybayon sa selebrasyon it San Juan de Bautista, magapatigayon it clean-up drive activity ro Diocese of Kalibo sa Lambingan ag Bougainvillea beach.
Suno kay Fr. Jose Tudd Belandres, Kopa Paroko it Saint John the Baptist Cathedral nga bandang alas-5 it aga-aga it martes, Hunyo 22 paga-umpisahan nanda ro paglimpyo sa nasambit nga mga baybayon.
Ro aktibidad hay pagapangunahan ni Bishop Jose Corazon Talaoc, mga kaparian ag pilang mga volunteers it simbahan.
Tuyo it andang aktibidad nga maduso ro adbokasiya nga pagpalangga ag pagtatap sa environment nga mas pang ginpabaskog ni Pope Francis.
Target nanda sa clean up drive ro mga nagkaeain-eain nga basura partikular ro mga plastic, lata ag iba pang bottled containers.
Nagpanawagan man imaw sa tanan nga mga pumueuyu nga maging responsabli sa pagpilak it mga basura.
Ro nasambit nga aktibidad hay nauna eon nanda nga ginpatigayon sa mga C. Laserna St. Kalibo.
Sa pihak nga parte, gindugang pa ni Fr.Tudd nga nagapadayun ro selebrasyon it simbahan sa kapistahan ni San Juan de Bautista pinaagi sa pagpatigayon it mga misa.
Sa kamatuoran suno kana ko Hunyo 15 hay nag umpisa eon ro novena prayers ag masses.
Kamana man ro paglibot ukon “recorida” it imahe ni San Juan sa Hunyo 23 sa kada Barangay it Kalibo bilang kaparte gihapon it pagpahaum sa fiesta.
Sa Hunyo 24 hay makaangkon it procession sa Barangay Poblacion bandang alas-6 it agahon ag bandang alas-7 it agahon hay magapatigayon it misa.
