Kalibo Aklan —– Ginkansela eon it Diocese of Kalibo ro mga nakaangdan nga hilikuton it simbahan ag iba pang aktibidad para sa paaeabuton nga semana santa sa tunga it paeag it 2019 coronavirus disease (COVID-19).
Raya hay sandig sa ginpaguwa nga abiso ni Kalibo Bishop Jose Corazon Tala-oc para masiguro ro kaeowasan it mga miyembro it simbahan kamana man it mga tumueoo.
May kaangtanan kara, gin-engganyo ni Bishop ro mga tumueo-o nga magpabilin eon lang sa andang panimaeay, magbasa it bibliya ag magrosaryo.
Kanselado ro mga public worship sa 24 nga parishes sa bilog nga probinsya it Aklan kaeakip eon kara ro misa sa masobra 350 ka mga chapels sa 17 ka mga kabanwahan halin makaron nga adlaw, Marso 17 hasta it Abril 20, 2020.
Gin-engganyo man ni Bishop Talaoc ro mga kaparian nga magpatigayon it pribadong misa kaibahan ro pila ka mga lay ministers.
Samtang, ro mga tumueo-o hay pwede nga magtan-aw eon lang it misa sa TV ukon sa social media.
a pihak kara, bukas gihapon ro simbahan sa pila ka mga serbisyo kaparehas it mga magakumpisar, funeral masses nga ro allowed hay ro close family eamang ag ro nagapabunyag nga hasta eamang it daywang ka eapsag ro pwede nanda nga i-cater.
Ro pila ka mga aktibidad makaron nga semana santa ro kanselado hay ginakaeakipan it Kumpisalang Bayan, prosisyon, pagbindita it mga lukay, live Siete Palabras sa Biyernes Santo, Easter Vigil ag Encuentro ukon Salubong sa dominggo it pagkabanhaw.
