KALIBO, Aklan–Sangka international flight ro nag-emergency landing sa Kalibo International Airport ko marso 1 bangud sa maeain nga paniempo.
Suno kay Engr. John William Fuerte, manager it Civil Aviation Authority of the Philippines ukon CAAP-Aklan daywang beses nga naghana nga mag-landing ro Royal Air sa Caticlan Airport apang bangud sa zero visibility hay nagdesisyon ro piloto kara nga i-divert ro flight sa Kalibo airport.
Halin sa Taipei, Taiwan ro eroplano sakay ro kapin sa 120 hasta 150 nga mga pasahero nga puro Taiwanese nga magabakasyon sa isla it Boracay.
Ro Royal Air hay may direct flight sa Caticlan Airport.
Eowas nga nakahugpa ro eroplano kaibahan ro mga pasahero nga insigidang gin-asikaso it mga tawuhan it Bureau of Customs, Bureau of Immigration ag Bureau of Quarantine.
Ko nagtaliwan nga mga inadlaw hay nakakaexperiensiya it haeos bilog nga adlaw nga pag-uean ro Aklan bangud sa amihan.
Dugang pa ni Engr. Fuerte nga kapin sa pitong domestic flights eon ro nagatugpa sa paeuparan kada adlaw kamana man nga nabatyagan eon ro sigidas nga pag-aeabutan it mga international ukon direct flight halin sa Korea ag Taiwan.
