Kalibo Aklan———–Ginkundina it Bagong Alyansang Makabayan (Bayan-Aklan) ro direktiba ni Pangueong Rodrigo Duterte nga hugtan ro hueag it mga owa pa it kompletong bakuna kontra COVID-19 .
Suno kay Kim Sin Tugna, provincial coordinator it Bayan-Aklan nga ro ‘No Vax, No Labas’ hay bukon it sabat agud nga mabaeabagan ro Covid 19 surge.
Ro kinahangean sigon hay ayuda para sa tanan bangud nga sigurado nga maabu eon man ro maduea-an it trabaho ag pangabuhian .
Gindugang pa kara nga dapat nga mas pang padasigon ro pagrolyo it COVID-19 vaccines ag booster shots kaysa nga pugngan ro hueag it mga bukon it bakunado.
Importante man sigon ro vaccine education sa nasyon agud nga maeubtan it tanan ro importansiya it bakuna bilang proteksyon sa deadly virus.
Mag-eowas kara, kinahangean man nga irespeto ro tawhanong kinamatarung ag bukon it ro sapilitan ag mapamigos nga mga polisya angot sa pandemya ..
Klaru suno kana nga palpak ro militarisasyon nga pamaagi it pagsabat sa covid 19 pandemic.
Mag-eowas kara, dapat man nga pabaskugon ro health care services kun sa siin, dapat nga obrahon nga libre ro pagbueong pag-abot sa COVID-19, nga kon amat hay naga abot sa minilyong piso ro gastos sa mga ospital sa Pilipinas.
Ginsuhestiyon pa it militanteng grupo nga taw-an it aksyon ro ginapangayo nga benepisyo it mga health care workers.
