KALIBO, Aklan—Ginaproponer makaron ni Kalibo Sangguniang Bayan (SB) member Matt Aaron Guzman ro disenyong prototype divider sa mga tricycle agud nga madugangan ro andang pwede nga masakay nga pasahero sa tunga it pandemya.
Suno kana, bukon eamang it pamasahe ro pwede nga tutukan makaron nga panyempo kundi kon paano man makabulig sa mga drivers kamana man sa mga commuters.
Ro nasambit nga disenyo suno kana hay nagakabagay para makasakay it ap-at nga pasahero mag-eowas sa driver.
Base sa ginaproponer kara nga prototype design, sambilog ro makasakay sa prente nga porsyon it tricycle kon sa siin may barrier sa likod ag imaw man ro matabo sa likuran nga bahin it behikulo kon sa siin makaangkon man it divider sa magtimbang nga pasahero para makasakay it daywa kamana man kaparehong tikang ro himuon sa tunga it driver ag backrider.
Ginpahayag dugang nga bukon eamang raya it para sa mga kalibonhon kundi pwede man nga ma-adopt it ibang kabanwahanan kon sa siin tricycle ro nagapangunang transportasyon sa bilog nga probinsya it Aklan.
Aminado si SB Guzman nga makagastos ro mga drivers sa pagbakae it plastic celoloids apang mabahoe sigon raya nga bulig kana.
Suno pa kay SB Guzman, sa makaron pa eamang hay ginkalipay sigon raya it mga drivers bangud nga nauna eon nga naghinyo sanda nga makapasakay it tatlong katawo agud nga madungan man ro andang igauli nga kita sa andang pamilya.
Target nga mapasa ro anang resolusyon sa Provincial Inter Agency Task force on Covid-19 makaron nga adlaw ukon hin-aga para masayuran insigida ro andang sentensya.
