Kalibo Aklan ———Nagapati si Nabas Mayor James Solanoy nga ro disiplina ag pagbakuna ro makabulig agud nga mapahinay ro pagkalhit it COVID-19 ag maprotektahan ro kaugalingon, pamilya, ag ro mga komunidad.
Ginkalipay man ni Mayor Solanoy ro pagnaba it andang kaso matapos nga magpatuman it hugut nga patakaran.
Ginpahayag dugang nga maabu eon man nga mga taga-Nabas ro gustong magpabakuna matapos makita nga mabahoe raya nga proteksyon kontra sa nasambit nga sakit .
Nagapati si Mayor Solanoy nga ro pagbakuna hay sangka importanteng pamaagi agud nga makabulig nga makabalik sa normal ro sitwasyon .
Angot kara, nagpanawagan man imaw sa publiko nga indi maging pasaway ag padayun nga magsunod sa ginapatuma nga minimum health standard kamana man nga magtinir anay sa sueod it baeay kon owa man lang it importanteng paeanawon agud nga owa it matapikan ro virus.
