Sangka resolusyon ro gindihon sa sangguniang panlalawigan it aklan nga nagasuporta sa pilang proposed bill sa manabang kapueongan it kongreso nga nagatuyo nga pataasan ro diskwento nga ginatau sa mga baeayran it mga senior citizens partikular sa tubi ag kuryente.
Suno kay board member jay tejada nga sa idaeum it proposisyon hay igapataas eon sa 10% ro discount nga ginatau sa mga senior citizens halin sa presenteng 5%.
Raya hay bilang pag amyenda suno kana sa naga-eksister nga laye sa expansion it privileges and benefits it mga lolo ag lola.
Maging applicable sigon ro nasambit nga diskwento sa unang 200 kilowatt per hour nga konsumo sa kuryente samtang sa first 30 cubic meters man para sa konsumo sa tubi.
Ginpamilit ni tejada nga tuyo kara nga mapahagan-hagan ro kalisod nga ginapangatubang it mga senior citizens sa nagatinaas nga mga baeak-eon partikular ro andang ginabakae nga maintenance nga bueong.
Ro nasambit sigon nga mga hagna hay gin-refer eon sa committee on appropriations ag committee on social welfare it house of representatives.
Ginaduso sigon nanda ro pagsuporta sa nasambit nga mga hagna agud nga magtau it pressure ag reminder sa mga mamalidha ag maipaabot nga raya ro sentimiento it probinsiya it aklan pinaagi sa provincial board nga mapadasig ro pag-apruba kara.
Sa pihak nga parte, suportado man nana ro senate bill ni senador bong revilla nga nagapanaba sa retirement age nga 56 para sa optional ag 60 para sa compulsory sa mga empleyado it govyerno agud nga ma-enjoy sa mas temprano ro andang retirement benefits
