KALIBO, Aklan—Dismayado ro mga hotel ag resort owners sa isla it Boracay matapos nga bumagsak ro tourist arrival sa Boracay matapos nga ikasa ro NCR Plus bubble.
Suno kay provincial administrator Atty. Selwyn Ibarreta, amat-amat eon kunta nga nagataas ro mga bisita umpisa nga ginpasugtan ro paggamit it RT-PCR saliva test, apang bangud sa gulping pagtaas it kaso it covid 19 sa nasyon rason nga ginbawae anay ro mga pagbiyahe paguwa it Metro Manila ag kaiping nga probinsiya it Cavite, Rizal ag Bulacan.
Nasayuran nga umpisa nga ginpaguwa ro resolution no. 104 it National Inter-Agency Task Force ko Marso 22 hay nakaangkon it maabu nga mga nakanselang bookings it mga turista paagto sa Boracay.
Umpisa nga buksan suno kana ro Boracay sa domestic tourists ko Oktubre it nagtaliwan nga dag-on hay ro mga turista halin sa National Capital Region ag mga kaiping nga probinsiya ro nagapanguna sa mga nagbisita sa isla.
Ginatutukan sigon nanda makaron ro mga turista nga magahalinn sa aklan ag mga kaiping kara nga probinsiya sa Western Visayas.
