Naibalik eon sa nasyon si dismissed Bamban, Tarlac Mayor Alice Guo matapos raya nga maaresto sa Indonesia.
Gin-ibhan imaw nanday Interior Sec. Benhur Abalos ag Philippine National Police Chief Rommel Marbil.
Bandang ala-1:00 it aga-aga naghugpa ro ginsakyang private plane ni Guo.
Una raya nga gintaeana kahapon, apang bangud sa pilang pagsa-ayos it proseso sa tunga it Pilipinas ag Indonesia hay gabie eon nakahalin ro team nga nagsueang sa ginpatalsik nga alkalde.
Madumduman nga ko May 22, 2024, ulihing nakita sa Pilipinas ro dating alkalde kat nag-atubang imaw sa Senado angot sa imbestigasyon may kaangtanan sa Philippine Offshore Gaming Operators ukon POGO.
Apang, ko unang dominggo it Hulyo, ginsuspinde imaw bilang mayor.
Matapos raya hay nagpaeagyo si Guo, kaibahan sanday Wesley Guo, Shiela Guo ag Casandra Ong.
Pag-abot it Hulyo 18, 2024, ginpahayag nga nakasueod ro grupo kara sa Kuala Lumpur, Malaysia.
Hulyo 21, 2024 kat sumakay raya sa flight paadto it Singapore kon sa siin imaw nagpabilin it haeos sang buean.
Agosto 18, 2024 kat naghalin sanda sa Singapore ag nag-adto sa Batam, Indonesia.
Agosto 19, 2024, gin-anunsyo ni Sen. Risa Hontiveros nga nakabuoe imaw it impormasyon nga nakahalin eon it nasyon ro dating alkalde.
Agosto 20, 2024, naaresto sanday Shiela ag Casandra sa Batam.
Setyembre 3, 2024 mat-a kat arestuhon it Indonesian authorities si Alice sa sangka villa sa Greater Jakarta.
