KALIBO, Aklan — Ginpaabot it Commission on Elections (COMELEC) Kalibo nga natigayon eon nanda nga mabaton halin sa central office ro Voter’s Information Sheet (VIS) ag iba pang mga forms para sa maabot nga eleksyon.
Suno kay Atty. Christian Itulid, election officer it COMELEC Kalibo nga posibleng sa masunod nga domingo hay paga-umpisahan eon nanda ro distribusyon kara sa mga pumueuyu.
Tuyo sigon kara nga magiyahan ro mga rehistradong botante sa maabot nga eleksyon.
Ro kaundan it kada VIS hay pangaean, address, precinct number it botante, ag ro lugar kun siin imaw magaboto sa Mayo 12.
Kaibahan man sa VIS ro sangka sample ballot nga may listahan it mga kandidato, pati man ro step-by-step nga guide kun paalin nga magboto, ag mga padumdum halin sa COMELEC antes ag sa mismong adlaw it eleksyon.
Ginklaru man ni Atty. Itulid nga sangka legal nga mandato ro pagpanupod it VIS sa mga rehistradong botante antes ro eleksyon.
Agud nga malikawan ro anumang pulitikal nga isyu, nagdesisyon ro COMELEC nga mag-hire it mga personnel para sa distribusyon it VIS.
Apela ni Atty. Itulid nga atubangon ro mga nagapanupod it nasambit nga pormas.
