Ginsiguro it Department of Energy (DOE) ro bastante ag masaligan nga suplay it kuryente sa nasyon sa pag-umpisa it School Year 2025-2026 sa Hunyo 16, kadungan it pagbalik it mga estudyante sa in-person classes.
Suno kay DOE Assistant Secretary Mario Marasigan, nakalinya eon ro mga tikang para maabot ro ginatuyong zero-brownout sa adlaw it klase.
Ginpamilit nana ro madinaeag-on nga implementasyon it zero-brownout ku elekyon bilang halimbawa it andang kapasidad nga ubrahon raya uman.
Haum eon man sigon ro mga proactive measures ag contingency plans it DOE para insigidang masolusyunan ro anumang power outage ukon grid issues nga posibleng magtuhaw sa pagbukas it klase.
Samtang, ginpatuman it Department of Education (DepEd) ro pagbalik sa tradisyunal nga school calendar, nga maga-umpisa makaron nga Hunyo ag matapos sa Marso 31, 2026. Ro 197 adlaw it regular nga klase hay base sa DepEd Order No. 012 series of 2025.
Tiwala ro DOE nga malikawan ro anumang aberya sa suplay it kuryente sa mahaegang adlaw it pagbukas it klase.
