Kalibo, Aklan-Gin-abisuhan it Department of Health ukon DOH Region 6 ro publiko nga insigidang aksyunan ro mga nabatyagan nga sintomas it dengue agud nga matapna ro pagkamatay it sangka pasyente.
Suno sa Emerging and Re-Emerging Infectious Disease Division it DOH Region 6, kaeabanan sa mga dengue-related deaths hay bangud sa delay nga pagpakonsulta ukon pilang adlaw eon ro nagtaliwan antes nga magpangayo it bulig sa doktor ro sangka pasyente.
Engkaso sigon nga eagnaton ro sangka unga sa sueod it daywang adlaw, dapat eon raya nga daehon sa Rural Health Unit agud insigida nga matan-aw kon raya hay may dengue.
Kaeabanan nga nagaguwa ro mas grabe nga sintomas it dengue kapareho it pagsakit it tiyan ag pagdugo kon maduea ro eagnat.
Nasayuran nga nagsaka eon sa masobra 12,000 ro kaso it dengue sa Western Visayas umpisa ko enero it makaron nga dag-on.
Ro Dengue hay sangka viral infection halin sa namok nga nagaeapta pinaagi sa sugod it infected nga Aedes mosquitoes kapareho it Aedes aegypti nga aktibo sa oras nga nagabut-eak ag nagatunod ro adlaw.
Kaibahan sa mga unang sintomas hay ro mataas nga eagnat, grabeng pagsakit it ueo, sakit sa likod it mata, joint ag muscle pain; rashes, ag mild bleeding.
Kon indi eagi mabueong, mahimo mag-develop ro dengue sa mas grabe kara nga porma kapareho it dengue hemorrhagic fever ukon dengue shock syndrome nga makamaeatay.
