KALIBO, Aklan—Nakataeanang paga-imbitahan sa session it Sanguniang Bayan it Kalibo ro pamunuan it Department of Health ag Municipal Health Office agud nga talakayon ro nagatinaas nga kaso it Coronavirus Disease ukon COVID-19 infection ag ro mga rekomendasyon nanda agud nga matapna ro mas pang pagkalhit kara.
Suno kay SB member Buen Joy Villanueva-French nga tuyo kara nga makahimo it mga konkretong tikang agud nga malikawan ro pagtinaas it kaso ag maprotektahan ro mga pumueuyu.
Nasayuran nga ro Kalibo ro nagapanguna sa may pinakamataas nga kaso it covid infection sa Aklan.
Posible man sigon nga matalakay nanda ro ginaduso nga “no movement Sunday” sa banwa it Kalibo agud nga mataw-an it daean ro pagbakuna sa mga negosyante ag disinfection.
Sa pihak nga parte, gindugang pa ni Villanueva-French nga aprubado man sa nagtaliwan nanda nga session ro anang resolusyon nga nagahinyu kay kalibo mayor emerson lachica nga magpahaum it dugang nga reserba it oxygen tanks bilang preparasyon sa worst case scenario.
Suno kana nga kinahangean raya nga pahauman eabi pa ag posibleng buksan eon man ro national capital region ag mga kaiping nga probinsiya kun sa siin may mga nailistang kaso it mas peligrosong delta variant.
Angot kara, ginkalipay man nana ro promisa it alkalde nga magapahaum it bastanteng buffer stock it oxygen tanks.
Mag-eowas kara, ginaduso man nanda nga maging haum ro mas abu pa nga mga quarantine facilities agud nga malikawan ro home quarantine.
