Ginpasiguro it Department of Health (DOH) nga uwa pa it aktibong mga kaso it Nipah Virus sa nasyon ag ginsigurado man nga padayon ro ginahimo nga pagpahaom it andang ahesya para malikawan ro pagsueod it virus sa borders it Pilipinas.
Suno kay DOH Assistant Secretary Albert Domingo, kaibahan ro Pilipinas sa mga nagastrikto sa mga nagasueod ag nagaguwa it borders kaibahan eon ro Taiwan ag Thailand bangud gihapon sa paeag it nasambit nga sakit.
Suno pa kana, sa andang ongoing monitoring, uwa pa it nailistang mga pumueoyo nga may mga sintomas ukon history it exposure sa Nipah Virus.
Paathag pa it tagapaghambae, base eon man sa datos nga gintao it India, daywa eamang ro kumpirmadong kaso it virus sa andang nasyon kon sa siin nakaabot eon man sa haeos 200 katawo ro andang naging tracing ag isolation nga tanan mat-a hay nagnegatibo sa virus ag ginapatihan man nga ‘contained’ sa makaron.
Ro mga sintomas it virus hay ordinary ag normal nga nababatyagan kaparehas it eagnat, pagpanakit it eawas, sip-on ag mala-trangkasong sakit kon sa siin ro malala nga sintomas hay ro paghaeok it utok.
