Ginmando eon ni Department of Justice (DOJ) Secretary Jesus Crispin ‘Boying’ Remulla ro pagbilog it sangka task force nga maga-imbestiga sa extra-judicial killings (EJKs) nga natabo sa war on drugs nga ginkasa ni dating Pangueong Rodrigo Duterte sa tyempo it anang administrasyon.
Base sa Memorandum Order No. 778, nga may petsang Nobyembre 4, 2024, ro nasambit nga task force hay pagapamunuan it Office of the Secretary ag pagakomponeran it mga prosecutors ag mga ahente it National Bureau of Investigation (NBI).
Kaibahan sa mga obligasyon it task force hay ro pag-imbestiga, pagbulig sa pagpatigayon it case build-up ag kon kinahang-ean hay pagpasaka it nagakaigong kasong kriminal sa korte sa mga tawong imbolbado sa EJKs.
Ginmanduan ni Remulla ro task force nga magsumite kana it report sa sueod it 60-diyas halin sa pagpaguwa it nasambit nga mandato.
