KALIBO, Aklan–Nakataeanang pagapasakaan it kaso it department of justice ro 13 nga persons of interests nga may kaangtanan sa pagpatay kay Percy Lapid ukon Percival Mabasa ag sa ginaturo nga middleman nga si Cristito “Jun Villamor” Palaña.
Suno kay Roy Mabasa, igmanghud it pinatay nga radio broadcaster nga hasta sa makaron hay nagapadayun ro imbestigasyon sa pagtumod sa iba pang eakot sa krimen eabi eon sa gina-alegar nga mga masterminds.
Sa kamatuoran suno kana nga sambilog pang person of interest ro sa kustodiya makaron it National Bureau of Investigation nga ginbiyahe halin sa Iwahig Prison and Penal Farm sa Puerto Princesa City, Palawan.
Nauna kara, ginpasiguro kanda ni Justice Secretary Jesus Crispin Remulla nga madali eon lang nga makilaea it mga imbestigador ro daywang persons of interests nga posibleng masterminds sa likod it pagpatay kay Mabasa ko Oktubre 3 ag sa makadueudang kamatayon ni Palaña ko Oktubre 18, ap-at nga oras matapos nga ginpangaeanan it nagsurender nga si Joel Escorial sa sangka press conference.
Ginasugid nga raya hay mga opisyal it Bureau of Corrections.
Gustuhon man sigon nana nga mitlangon ro pangaean it mga raya , apang gina-ulikdan nana ro anang kaeowasan.
Ginatugyan eon lang nana sa DOJ ro pagkilaea sa mga raya sa Lunes.
