Ginpamaeabagan ni Justice Secretary Jesus Crispin Remulla ro suhestyon nga mangin “state witness” si Sheila Guo kontra kay dating Bamban, Tarlac Mayor Alice Guo.
Nagapati si Remulla nga indi masaligan ag mapatihan nga testigo si Sheila Guo.
Ginpakigbahin it opisyal nga mabudlay patihan ro mga pahayag ni Sheila, eabi eon ro ginbulgar kara nga si Alice Guo nga nakasanayan nga magarbo ro pagpangabuhi, magasakay eang sa sangka fishing boat nga owa it matueugan ag maga-eayag sa magamo nga kaeawran paagto sa Malaysia.
Gintumod ni Remulla nga ro insidente hay kapareho sa sangka pelikula kun sa siin halin Zambales paagto sa Kota Kinabalu, Sabah hay may 1,300 kilometers, magabiyahe eang ro mga raya pinaagi sa sangka fishing vessel.
Owa man nagapati ro sekretaryo nga owa it nasayuran si Shiela angot sa kon siin nagbiyahe ro van nga andang ginsakyan, ro lugar nga kon sa siin sanda gindaea, ag ro mga detalye it mga baroto ag barko nga andang ginsakyan bangud nga kon isipon, mabuhay eon sanda nga naga istar sa Pilipinas.
Samtang sa ginduso man ni Sheila nga bukon sanda it magmaeanghud ni Alice Guo, ginpabutyag ni Remulla nga DNA test eon lang ro makapamatuod sa nasambit nga pahayag.
