POLICE Report — Sangka doktor ro nagapangatubang makaron sa mga kasong murder, robbery, ag illegal possession of military weapons sa Dong Nai, Vietnam matapos sigon nga patyon ag chop-chapon ro eawas it nobya nga anang hanabdusan agud nga itago ro andang extramarital nga relasyon.
Ginkilaea ro suspek nga si Danh Son, sangka general surgery specialist sa Dong Nai General Hospital.
Nagpaguwa it indictment kontra kana ko Enero 14.
Suno sa indictment, nagkakilaea si Son ag ro anang pasyente nga biktimang si “Marie” sa ospital.
Nakaangkon sigon ro daywa it romantikong relasyon maskin nga pareho eon nga pamilyado.
Ko ulihi, ginpahisayod sigon it babaye kay Son ko Marso 2024, nga imaw hay nabdos ag ginhinyu nga akuon ro responsibilidad.
Sa mga ginpasaka nga kaso, nahadlok sigon si Son sa posibleng epekto it andang relasyon sa anang pamilya ag karera rason nga nagdesisyon imaw nga patyon ro kabit ag tunga-on ro anang eawas agud nga owa it ebidensiya.
Natabu ro insidente ko Abril 13, 2024 kun sa siin gin-imbitahan anay nana ro biktima ag gintaw-an raya it IV treatment nga may sueod nga sleeping pills.
Matapos utdon ro eawas ag ibutang sa mga plastic bag, ginpilak nana raya sa nagkaeain-eain nga lugar sa Bien Hoa City ag Vinh Cuu district.
Gintakawan man ni Son ro babaye it kwarta ag mga alahas nga ginbaligya man nana ag ginpabayluhan it gold.
Gin-aresto man si Son it Criminal Investigation Police Department it Dong Nai Province ko Abril 26, 2024 para sa dugang nga imbestigasyon.
Nabo-oe man sa baeay it biktima ro limang bala ag sangka revolver.
