Indi makapati ro mga doktor sa sangka ospital sa Ipekyolu, Turkey kat matukiban nanda nga sambilog sa andang pasyente nga nakakabatyag it grabeng abdominal pain hay may 233 items sa sueod it anang tiyan.
Nagkaeain-eain nga bagay ro nakit-an it mga doktor sa tiyan it pasyente kapareho it coins, battery, magnet, eansang, bubog, bato ag turnilyo.
Suno sa surgeon nga si Dr. Binici, sambilog sa nagpatigayon it operasyon, madinaeag-on nanda nga nabo-oe ro tanan nga foreign objects sa tiyan it pasyente.
Dugang pa it doktor, naging sensitibo ro operasyon bangud sa sangka eansang nga nagtuga it damage sa stomach wall it pasyente.
Pagkatapos it madinaeag-on nga operasyon, presenteng ginapaidaeum sa psychiatric evaluation ro owa ginpangaeanan nga pasyente agud nga masayuran ro rason kon ham-an nga nagatueon raya it maabu nga mga bagay.
