KALIBO, Aklan – – – Nagpangayo it bulig sa Bombo Radyo Kalibo ro Department of Labor and Employment ukon DOLE-Aklan angot sa andang nagapadayun nga profiling it mga trabahador sa isla it Boracay kasunod it nagahilapit nga pagpasarado kara sa Abril 26.
Suno kay DOLE-Aklan Provincial Director Carmela Avillar nga ko nagtaliwan nga domingo hay gin-umpisahan nanda ro andang pagpa-fill-up it form sa mga formal ag informal workers agud nga isumite sa andang taeatapan ag matumod ro pagataw-an it nagakaigo nga assistance.
Ro mga owa pa sigon it pormas hay mag-agto eamang sa andang satellite office sa Brgy. Manocmanoc, Boracay.
Ro mga workers sigon nga may organisasyon hay pwedeng magdirekta sa andang natungdan nga taeatapan agud nga mapadasig ro pagbo-oe it forms.
Kinahang-ean suno kana nga magdaea it 2×2 picture para sa profile form.
Nag-apela man it kooperasyon si Avillar sa mga workers ag tag-ana it mga establishmento agud nga mapadali ro proseso bangud nga kueang man sanda sa tawuhan.
Ro deadline sigon it pagsumite it forms sa mga informal workers hay makaron nga adlaw.
Samtang, uman nga ginpasiguro ni Avillar nga haum ro DOLE-Aklan nga magtau it trabaho sa mga mapahalin nga trabahador.
Nagpangayo man sigon sanda it pondo para sa emergency employment ag livelihood project.
Magapatigayon man sigon sanda it job fair sa maabot nga Mayo 17.
Sa makaron hay nakikipagbueuligan sanda sa LGU-malay ag Philippine Chamber of Commerce and Industry ukon PCCI.
Nauna kara, nagpaandam ro DOLE sa mga employer nga magapatigayon it mass lay-off sa tiempo it closure order.
Apang, pwede sigon ro forced leave without pay.
Engkasong, pagasibakon hay dapat nga may separation pay.
