KALIBO, Aklan—Kinahangean eun nga magpaidaeum sa regular real-time polymerase chain reaction (RT-PCR) tests para sa COVID-19 ro mga trabahador sa pilang sektor kapareho it hospitality, tourism, ag manufacturing agud malikawan ro pagkalhit it virus sa workplaces.
Suno kay Niezel Sabrido, spokesperson it Department of Labor and Employment (DOLE) Region 6 nga kaeakip sa mga dapat nga magpaidaeum sa RT-PCR tests hay ro transport and logistics, food retail, education, financial services, non-food retail, services, public market, construction; water supply, sewerage, waste management; public sector, ag mass media.
Ro protocol nga kaparte sa bag-ong mando it gobyerno angot sa COVID-19 control and prevention sa mga workplace, hay epektibo ko Sabado.
Sa joint memorandum nga ginpagguwa it Trade and Labor departments, ginamanduan ro mga empleyado sa hospitality ag tourism sectors sa El Nido, Boracay, Coron, Panglao, Siargao, ag iba pang tourist zones nga gintumod it Tourism Department para magpaidaeum sa COVID-19 test sa kada ap-at nga dominggo.
Samtang, sang beses man kada quarter igatest ro mga empleyado maghalin sa manufacturing companies ag public service providers sa economic zones sa sueod it special concern areas; ag frontline ag economic priority workers.
Mag-euwas sa regular testing, required man ro two-day lockdowns para sa mga workplaces nga may unang kumpirmadong kaso it virus, para mataw-an it importansiya ro disinfection.
