KALIBO, Aklan—Uman nga nagpadumdom ro Department of Labor and Employment (DOLE-Aklan) sa mga kompanya ukon employer nga mapamatud-an nga nagapatuman it “No vaccine, No salary Scheme.”
Suno kay Dole-Aklan Head Joselito Dela Banda nga makabig nga illegal ro nasambitan nga tikang rason nga ginmando eun makarun ni DOLE Secretary Silvestre H. Bello III ro maidid nga monitoring sa nasambitan nga isyu.
Ginabawaean man ro makarondaya nga polisiya mas kapin ag sangka pag-eabag raya sa layi kapareho it non-payment of wages, nga sangka administrative proceeding nga una sa hurisdiksyon it DOLE.
Imaw man ro withholding of wages nga may una sigon nga criminal liability ag may sentensiyang pagkakulong ag multa.
Samtang, naga-imbestiga eun man makarun ro DOLE sa Trade Union Congress of the Philippines, agud matumod kung anong mga kompanya ro nagapatuman it No vaccine, No salary Scheme.
Samtang, sa pihak nga parte, ginpahayag man ni Dole Aklan Head Joselito Dela Banda nga sa makarun hay padayun ro andang pag-engganyo sa mga estudyante nga magpasakop sa andang programa nga Special Program for Employment of Students (SPES).
Tuyo sigon kara nga mabuligan ro mga estudyante nga eubos man nga naapektuhan sa tunga it ginapangatubang nga pandemya.
