Nagpaguwa ro Department of Labor and Employment (DOLE) it guidelines para sa tamang pasweldo sa Adlaw it mga Santo makaron nga November 1, Adlaw it mga Kaeag hin-aga, November 2 ag sa Bonifacio day sa November 30.
Nagpadumdom ro ahensiya sa mga empleyado ag mga employer makaron nga November 1 ag 2 hay ginakabig nga special non-working holidays ag ‘no work no pay’.
Apang, ro magasueod sa nasambit nga mga adlaw hay magabaton it andang regular nga adlawan nga swedlo ag may dugang nga 30%.
Para sa overtime work, makabaton it dugang nga 30% it andang hourly rate.
Sa mga magasueod mat-a sa special holiday nga natyempong rest day, ro mga empleyado hay dapat nga makabaton it dugang nga 50% it andang regular daily wage para sa unang 8 oras ag dugang nga 30% it andang hourly rate para sa overtime.
Samtang, para mat-a sa Bonifacio day nga sangka regular holiday, makabaton gihapon ro empleyado it andang bilog nga adlawang sweldo maskin nga uwa nagsueod sa trabaho ukon naka-leave with pay sa masunod nga adlaw.
Ro mga empleyado mat-a nga magatrabaho sa regular holiday hay makabaton it double pay ag dugang nga 30% it andang hourly rate para sa overtime work.
Ro mga magatrabaho mat-a sa regular holiday nga natyempong rest day hay makabaton it double pay ag dugang nga 30% ag para sa overtime, makabaton it dugang nga 30% it hourly rate.
