KALIBO, Aklan—Nagbalik eon man ro domestic flights sa Kalibo International Airport umpisa ko Agosto 19.
Raya ro ginkumpirma ni Engr. Eusebio Monserate, manager it Civil Aviation Authority of the Philippines ukon CAAP-Aklan.
Suno kana nga raya hay kasunod it uman nga pagpaidaeum sa Metro Manila ag kaiping nga mga probinsiya sa general community quarantine.
Ro dati suno kana nga mga gin aprubahan nga mga flights it airline companies hay nagapabilin makaron, kun sa siin, adlaw adlaw hay may flights nga ginatunga-tunga it tatlong airline companies.
Ro Cebu Pacific hay may scheduled flights sa paeuparan kada Miyerkules ag Sabado samtang ro Philippine Airlines hay nakatuka kada Biyernes ag Dominggo.
Ro AirAsia Philippines hay magapabilin sa schedule nga Martes ag Huwebes, apang owa pa sanda nakatau it bag-ong abiso.
Angot kara, ginlaygayan ni Engr. Monserate ro tanan nga mga pasahero partikular ro mga returning overseas Filipino workers, locally stranded individuals ag authorized persons outside of residence nga makipag angot anay sa andang mga airline companies para sa mga kinahangeanon nga requirements antes nga magbiyahe pasueod ag paguwa it Aklan.
Gindugang pa kara nga hugut sa gihapon nanda nga ginapatuman ro mandatory nga pagsuksok it face masks ag face shields samtang sa sueod it paeuparan kamana man ro pag obserba it social distancing.
Nagapabilin man sigon nga suspendido ro biyahe it mga airline carriers sa Kalibo airport halin sa mainland China, Macau, South Korea ag Taipei, Taiwan.
