Kumpiyansa nga kumpiyansa si WBC bantamweight champion Nonito “The Filipino Flash” Donaire nga maibaeos nana ro anang kaiyerdihan ku nagliwan nga 2019 sa alima it Japanese boxing star nga si WBA, IBF champion Naoya Inoue.
Nakataya sa andang showdown ro tatlong korona kaibahan eon ro WBC belt nga buyot it Pinoy world champion.
Suno kay Donaire, mabuhay eon sigon nana nga ambisyon nga maging undisputed world boxing champion kung siin raya ro kahigayunan nga mabuytan nana ro tanan nga ap-at nga korona.
Sin-o man ro magadaog sa June 7 hay posibleng masunod nga makontra ro bag-o eamang nagkampeon sa World Boxing Organization (WBO) nga si Paul Butler.
Engkaso nga magdaog sa rematch si Donaire, ginaeauman nga maging madali eon lang nga maplastar ro bakbakan kontra kay Butler bangud sambilog eamang ro andang promoter sa idaeom it Probellum.
Samtang, gin -insister man ni Donaire nga indi man sigon imaw magpasugot sa nasambit nga rematch sa Japanese champion kung indi man imaw magdaog sa kahigayunan ngara.
