KALIBO, Aklan—Ginbida eun it Local Government Unit ukon LGU-Kalibo ro donasyon it Kalibo Pilot Elementary School Batch 1968 nga Logistic Indoor Service Assistant (LISA) robots.
Suno kay Mr. Basil Tabernilla, Executive Assistant to the Mayor sa banwa it Kalibo nga mabahoe nga bulig ro donasyong LISA robot augd nga malimitahan ro exposure it mga health care workers sa pag asikaso sa mga pasyenteng natapnan it coronavirus disease 2019 (Covid-19).
Dugang pa kara nga ro nasambitan nga proyekto hay ginkabuligan it Rotary Club of San Juan West , Department of Science and Technology (DOST) ,ag ro faculty of engineering it University of Santo Thomas.
Makabig man sigon nga swerte ro pagkaangkon it koneksyon it mga raya sa mga Scientist ag inventors sa nasambitan nga eskwelahan.
Pagagamiton ro LISA agud nga mas mapadali pa ro pakikipagsukoe it lokal nga gobyerno kontra COVID-19.
Ro LISA Robot hay sangka remote-controlled wheeled device kung sa siin maka-istorya it mga health professionals ro andang pasyente pamagi sa Wi-Fi gamit ro computer, tablet, ukon smartphone.
Maga-andar man raya gamit ro 12-volt battery ag magabuhay it waeong oras.
Makasarang man raya nga mag-deliver it oral medication, pagkaon, bueong, tubi ag basic necessities kapareho it sabon shampoo ag iba pa.
