KALIBO, Aklan—Handum it Department of Science and Technology ukon DOST scholar ag topnotcher sa bag-o eamang natapos nga Licensure Examination for Teachers ukon LET nga makabulig man sa iba partikular sa anang daywang igmanghud.
Suno kay Wenn Irabon Ricaforte it Brgy. Kinalangay Viejo, Malinao nga maskin owa ginaeauman, proud moment para kana nga naeakip sa mga nagpanguna sa mga nakapasar sa nasambit nga board exam.
Sa kamatuoran suno kana kat gin release ro resulta hay ro anang amiga pa ro nag-inform kana nga top 9 imaw sa mga nakapasar bangud nga idtu imaw nag-usoy it anang pangaean sa website mismo it PRC sa listahan it mga passers.
Ginpasaeamatan man ni Ricaforte ro anang review center bangud sa pag engganyo kanda nga maghandum it mabahoe ag mataas.
owa sigon naging sabeag ro kapigaduhon it andang pagpangabuhi agud nga magpursige kun sa siin ginbaeusan nana ro sakripisyo it anang mga ginikanan pinaagi sa paghugod sa pagtuon hasta nga naangkon makaron ro kadaeag-an.
Naging mabudlay man suno kay Wenn nga mapaeayo sa anang mga ginikanan samtang naga-eskwela sa kolehiyo sa siyudad it Iloilo.
Si Ricaforte hay nagtapos it elementarya hasta senior high school sa Kinalangay Viejo Integrated School ag nag-kolehiyo bilang DOST scholar umpisa 1st year hasta 4th year sa Central Philippine University ukon CPU sa Iloilo.
Imaw hay panganay sa tatlong magmaeanghud.
