KALIBO, Aklan — Nagtingob pwersa ro Department of Tourism (DoT) ag Department of Environment and Natural Resources (DENR) agud matutukan ro mga naga pangunang problema sa isla it Boracay.
Suno kay Governor Florencio Miraflores nga kaibahan sa gin patawag nga multi-sectoral meeting, nagbilog it executive order sanday Tourism secretary Wanda Teo ag Environment secretary Roy Cimatu para sa pagbilog it Task Force Boracay nga nakataeanang isumite kay Pangueong Rodrigo Duterte.
Nauna eon nga nagpatigayun it ocular inspection ro daywang opisyal kahapon sa isla matapos mapansin nga bukon sigon it balanse ro gina himong pag amlig sa palibot ag pag umwad it turismo.
Maka-alarma eon sigon ro maabong mga tawo nga naga sueod sa isla butang nga naga tuga it polusyon sa tubi kamana man ro overdevelopment.
Gin suhestiyon pa sa pueong nga imbes nga stage by stage ro pagpatigayun it drainage project hay himuon sigon raya nga bulto.
Nabuksan man ro isyu hanungod sa kawad-an it naga kaigong sewerage system kun siin pilang pasaway nga business establishments ro iligal nga naga kabit ag direktang naga pilak it higku sa rainwater drainage system.
Sa pihak nga parte, gin talakay man ro masaming pagbaha sa isla ag ro problema sa basura nga gina himuan eon sigon it aksyon it LGU-Malay.
