Ginpaiway anay it bag-ong opisyal it Department of Tourism (DOT) ro pagbilog it pinal nga posisyon sa planong tulay patabok sa Boracay ag sa proposisyong pagkakas it travel tax.
Suno kay Tourism Secretary-designate Ma. Bernadita Angara-Mathay, kinahang-ean anay nga tun-an ro magiging kabilugang epekto it P7.8-bilyong Boracay bridge project, kapin eon sa kalikasan, pangabuhian it mga residente, ag konektibidad it isla.
Ginpahayag man kara nga gusto nana nga mapabilin anay ro travel tax samtang uwa pa it kabaylo nga pondo para sa mga proyekto it Tourism Infrastructure and Enterprise Zone Authority (TIEZA), kaibahan ro imprastraktura, pag-ensayo ag rehabilitasyon it mga tourist site.
Samtang, nagapabilin anay ro target it DOT nga 6.7 milyong dumueoong turista makaron nga 2026, maskin may epekto ro energy crisis sa bookings ag pagbyahe.
Halin Enero hasta it Abril 27, nakalista ro nasyon it 2.24 milyong international arrivals, ukon haeos 9 porsiyentong mas mataas kumpara sa kaparehong tyempo ko nagtaliwan nga dag-on.
