Kalibo Aklan ——-Nagataeana ro Department of Tourism (DOT) it kapin sa P8 million pesos agud nga sabton ro gastos sa Reverse Transcription Polymerase Chain Reaction (RT-PCR) test para sa kapin sa 4,000 nga tourism workers sa Isla it Boracay bilang tikang agud nga uman nga mabuhi ro industriya it turismo sa Isla.
Suno kay Tourism Secretary Bernadette Romulo-Puyat nga tuyo kara nga mapabaskog ro kumpiyansa it mga bisita ag maprotektahan ro andang ikamayad nga eawas kamana man nga makabalik eon sa trabaho ro mga tourism workers.
Ro Tourism Promotions Board it DOT ro magatau it pondo nga igapaagi sa Provincial Government.
Nasayuran nga umpisa Oktubre 1 hay pormal eon nga nagbaton it bisita ro Boracay halin sa iba pa nga parte it nasyon.
Sambilog ro Isla sa mga eubus nga naapektuhan bangud pilang buean nga pagpasatado kasunod it ginpatuman nga travel restrictions ag community quarantine measures tuga it COVID-19.
Sa makaron hay nagapabilin nga manaba ro tourist arrival sa Boracay nga naga-abot pa eamang sa 658 umpisa nga ginbuksan raya ko Oktubre 1.
